Valideynlərin illərdir gözlədiyi funksiya nəhayət Spotify-a gəlib. Şirkət uşaqların və ailənin birlikdə dinlədiyi musiqilərin istifadəçinin şəxsi zövq profilinə təsir etməsinin qarşısını alan yeni funksiya təqdim edib.
Bundan sonra istifadəçilər xüsusi keçid vasitəsilə uşaqlar üçün nəzərdə tutulmuş mahnıları zövq profilindən çıxara biləcəklər. Funksiya aktivləşdirildikdə Kidz Bop, Disney mahnıları və digər uşaq musiqiləri şəxsi tövsiyələrə təsir etməyəcək. Yəni övladınız bütün gün eyni mahnını dinləsə belə, həmin trek ilin sonunda sizin Spotify Wrappeds iyahınızın zirvəsinə çıxmayacaq.
Yeni imkan artıq bütün dünyada Free və Premium istifadəçilər üçün mobil cihazlarda istifadəyə verilir. Funksiya ilkin olaraq aktiv vəziyyətdə olacaq, istifadəçi onu söndürdükdə isə uşaqlar üçün nəzərdə tutulan musiqilər zövq profilindən çıxarılacaq.
Bu problemin yaranmasının əsas səbəbi ailələrdə eyni Spotify hesabının müxtəlif cihazlarda istifadə edilməsidir. Məsələn, televizorlar və ağıllı dinamiklər çox vaxt valideynin hesabına qoşulur və uşaqlar həmin hesabdan musiqi dinləyirlər.
Nəticədə Spotify hesab sahibinin həqiqətən hansı musiqini sevdiyini, hansını isə sadəcə uşaqların xatirinə dinlədiyini ayırd edə bilmir. Bu da zamanla Discover Weekly, Daily Mix və digər fərdiləşdirilmiş tövsiyələrin keyfiyyətinə təsir edir.
Yeni funksiya aktivləşdirildikdən sonra cizgi filmlərinin mahnıları və uşaq mahnıları tövsiyələrə daxil edilməyəcək. Üstəlik, dəyişiklik geriyə şamil olunur. Yəni əvvəllər dinlənilmiş uşaq mahnıları da Wrapped-də ilin ən çox dinlənilən mahnısı və ya ifaçısı kimi nəzərə alınmayacaq.
Spotify əvvəllər ayrı-ayrı mahnı və pleylistləri zövq profilindən çıxarmağa imkan verirdi. Lakin bunu hər dəfə əl ilə etmək lazım gəlirdi. Yeni funksiya isə prosesi xeyli sadələşdirir.
Şirkət son dövrdə uşaqlar üçün ayrıca Managed Accounts hesablarını da təqdim edib. Bu hesablar 13 yaşdan kiçik istifadəçilər üçün nəzərdə tutulub və valideynlərə yaşa uyğun məzmunla yanaşı müxtəlif nəzarət imkanları verir.
