BMW şirkəti yeni iX3 50L elektromobilinin yürüş məsafəsi üzrə rekord müəyyənləşdirdiyini açıqlayıb. Xüsusi sınaq yürüşü zamanı avtomobil əlavə şarj doldurulmadan 1030,2 km yol qət edib və batareyada hələ də 5% şarj qalıb.
BMW bildirir ki, bu, şirkətin elektromobilləri arasında müəyyən edilən yeni rekorddur. Sınaq üçün iX3 50L Şenyandan Pekində yerləşən BMW tədqiqat mərkəzinə qədər hərəkət edib. Modelin CLTC standartı üzrə rəsmi yürüş ehtiyatı 919 km təşkil edir. Beləliklə, avtomobil real sınaq zamanı bu göstəricini 100 km-dən çox üstələyib.
Yüksək enerji səmərəliliyini yeni nəsil BMW eDrive elektrik ötürücü sistemi, 800 voltluq arxitektura və diametri 46 mm olan iri formatlı batareya elementləri təmin edib. Mühəndislər həmçinin termal idarəetmə sistemini, elektrik ötürücünü və avtomobilin aerodinamikasını optimallaşdırıblar.
BMW iX3 50L üçün ön sifarişlərin 21 avqustda Çendu avtosalonunda açılması planlaşdırılır.
