Google öz e-poçt xidməti Gmail-də yeni reklam formatını sınaqdan keçirməyə başlayıb. İlkin rəy və müşahidələrə görə, şirkət sadəcə reklam göstərməklə kifayətlənmək istəmir — tezliklə Gmail-də, marketpleyslərə bənzər şəkildə, məhsulları birbaşa almaq imkanı yaranacaq.
Search Engine Land portalının məlumatına əsasən, bu yenilik artıq test qrupuna daxil olan bəzi istifadəçilər üçün aktivdir. Söhbət «Təkliflər» qovluğunda yerləşdirilən genişləndirilmiş reklam elanlarından gedir. Ənənəvi reklam məktublarından fərqli olaraq, bu formatda məhsul kartları birbaşa başlıqda əks olunur və istifadəçi həmin karta klik etdikdə oxşar təkliflərin əks olunduğu karusel açılır.
Əgər bu yanaşma uğurlu alınsa, Gmail gələcəkdə birbaşa poçt qutusundan sifariş verilməsi mümkün olan müstəqil bir ticarət platformasına çevrilə bilər. Bununla belə, test mərhələsinin nə qədər davam edəcəyi və funksiyanın hansı ölkələrdə istifadəyə veriləcəyi hələlik məlum deyil.
