İlon Mask daha əvvəl bəyan etmişdi ki, Tesla-nın insanabənzər robotu — Optimus — şirkətin tarixində ən vacib məhsul olacaq. Onun sözlərinə görə, artıq bu ilin sonuna qədər minlərlə belə robot Tesla zavodlarında işləyəcək. Lakin bu layihənin ilk rəhbəri Kris Volti tam fərqli mövqe sərgiləyib.
Volti hesab edir ki, insanabənzər robotlar sənaye istehsalı üçün uyğun deyil. Onun fikrincə, sürətin və dəqiqliyin vacib olduğu sahələrdə belə robotlar səmərəli olmayacaq. O vurğulayıb ki, sənaye daha sadə və məqsədyönlü həllərə ehtiyac duyur, kompleks və çoxfunksiyalı humanoid robotlara yox.
Bu arada, Tesla artıq Optimus-un iki prototipini zavodlarından birində test edir, amma onların hansı işləri gördüyü açıqlanmır. Voltinin şübhələrinə baxmayaraq, Mask Optimus-u inqilabi məhsul kimi təqdim etməyə davam edir. Şirkət robotların rəqs etdiyi, təmizlik apardığı və zibili tulladığı videolar da yayımlayıb.
Lakin 2024-cü ilin oktyabrında keçirilən təqdimatda bəlli oldu ki, həmin nümayiş zamanı robotlar əslində uzaqdan insan tərəfindən idarə olunurdu. Bu isə Optimus-un real muxtariyyəti ilə bağlı ciddi suallar doğurdu.
