Google şirkətinin baş direktoru Sundar Pichai federal məhkəmədə antiinhisar işinə dair ifadə verərkən, Apple ilə Gemini süni intellekt platformasının iOS 19 əməliyyat sisteminə daxil edilməsi ilə bağlı danışıqların aparıldığını təsdiqləyib. Bu barədə Bloomberg jurnalisti Mark Gurman məlumat yayıb.
Hazırda Gemini tətbiqini App Store vasitəsilə iPhone-a yükləmək mümkündür, lakin Google-un əsas məqsədi bu AI köməkçisini sistem səviyyəsində inteqrasiya etdirməkdir. Beləliklə, Gemini iOS və Apple Intelligence üçün ayrılmaz bir hissəyə çevrilə bilər.
Bu əməkdaşlıq Apple-a süni intellekt sahəsində rəqiblərlə fərqi qısa zamanda aradan qaldırmaq imkanı verəcək. Google isə bu addımla mobil cihazlar — smartfonlar, ağıllı saatlar və televizorlar da daxil olmaqla — bazarda liderliyini daha da möhkəmləndirəcək və OpenAI-nin mövqelərini zəiflədəcək.
Şirkətlər qarşılıqlı faydalı razılığa gələ biliblərmi — bunu yaxın vaxtlarda öyrənəcəyik. Apple artıq 9 iyun 2025-ci il tarixində keçiriləcək WWDC tədbirində iOS 19-u təqdim etməyə hazırlaşır.
