Nəqliyyat, Rabitə və Yüksək Texnologiyalar Nazirliyinin, Heydər Əliyev Fondunun, Təhsil Nazirliyinin və AMEA-nın İnformasiya Texnologiyaları İnstitutunun birgə təşkilatçılığı ilə “Ali məktəb tələbələri arasında informatika üzrə Ümumrespublika Olimpiadası” 2017-ci ildə növbəti 12-ci dəfə keçiriləcəkdir. Cari ildə Olimpiadanın ilk mərhələsinin 29 aprel, növbəti (final) mərhələsinin isə 06 may tarixində keçirilməsi planlaşdırılır. Olimpiadada iştirak etmək üçün 21 aprel 2017-ci il tarixinə qədər qeydiyyatdan keçmək zəruridir.
Olimpiadada hər bir ali təhsil müəssisəsindən maksimum 4 komanda qeydiyyatdan keçə bilər və hər bir ali təhsil müəssisəsinin ən yaxşı nəticə göstərən yalnız 1 komandası Olimpiadanın ikinci (final) mərhələsinə vəsiqə qazanacaqdır. Hər komanda 1 nəfər rəhbərdən (müəllim) və 3 nəfər iştirakçıdan (tələbə — bakalavr) təşkil olunmalıdır.
Olimpiadanın 1-ci mərhələsi 29 aprel 2017-ci il tarixində saat 10:00-da Bakı Mühəndislik Universitetində keçiriləcəkdir. Olimpiadaya gələn komanda üzvləri şəxsiyyət vəsiqəsi və tələbə biletlərini özləri ilə gətirməlidirlər.
