Azərbaycan dilində klaviaturanın yeni düzülüşü Windows 8.1 əməliyyat sisteminin yeni versiyasına inteqrasiya edilib. Bu barədə Trend-ə «Microsoft Azerbaijan» şirkətindən bildirilib. Şirkətdən bildirilib ki, təkmilləşdirilmiş klaviaturanın düzülüşü Rabitə və İnformasiya Texnologiyaları Nazirliyi tərəfindən yeni milli standart kimi qəbul edilib.
Yeni düzülüşdə yığım sürəti və barmağa düşən yükün paylaşdırılması kimi nüanslar nəzərə alınıb ki, bu da bilək nahiyəsinin daha çox təsadüf edilən xəstəliklərindən biri olan «Karpal sindromu kanalı»nın inkişafının qarşısını ala bilər.
Klaviaturanın yeni düzülüşü «Microsoft» məhsullarında istifadə ediləcək və vaxt ötdükcə digər əməliyyat sistemləri üçün də həyata keçirilə bilər.
Rahatlıq baxımından yeni düzülüş daha optimaldır və orada Azərbaycan dilinin bütün nüansları əks olunub, halbuki buna köhnə versiyada rast gəlmək mümkün deyil. Köhnə düzülüş ləğv edilməyəcək və ona öyrəşmiş insanlar köhnə klaviaturadan istifadə etməyə davam edəcəklər.
