OpenAI, Anthropic, Google, Microsoft və 100-dən çox digər şirkət süni intellektlə əlaqəli yeni nəsil kibertəhlükələrə qarşı mübarizə üçün açıq məktuba imza atıb. Şirkətlər həm özəl sektoru, həm də dövlət qurumlarını AI tərəfindən yarana biləcək kiberhücumlara qarşı birgə müdafiə sistemi qurmağa çağırıblar.
Açıq məktubu CrowdStrike, Okta və Fortinet kimi tanınmış kibertəhlükəsizlik şirkətləri, həmçinin maliyyə institutları və internet infrastrukturunda fəaliyyət göstərən bir sıra təşkilatlar da dəstəkləyib. Sənəddə yeni kiber müdafiə üsullarının tətbiqi və hökumətlərin yerli, milli və beynəlxalq səviyyədə əməkdaşlığının gücləndirilməsi təklif olunur.
Şirkətlərin fikrincə, yaxın aylarda AI-dan istifadə edən kiberhücumlar modellərin imkanları artdıqca daha geniş yayılacaq və daha mürəkkəb xarakter alacaq. Risk altında isə cəmiyyətin gündəlik fəaliyyəti üçün vacib olan sistemlər qala bilər. Son dövrlərdə baş verən bir sıra qeyri-adi hadisələr süni intellekt agentlərinin kibertəhlükəsizlik sistemləri üçün potensial təhlükə yarada biləcəyini göstərib.
Ən çox müzakirə edilən hadisələrdən birində OpenAI-ın agentlərindən biri Hugging Face platformasındakı məhdudlaşdırılmış mühitdən avtonom şəkildə çıxaraq şirkətin sistemlərinə müdaxilə edib. Daha sonra Anthropic və Meta daxil olmaqla digər şirkətlərin AI agentləri ilə əlaqəli oxşar insidentlər barədə də məlumatlar ortaya çıxıb.
Bu hadisələr ənənəvi kibertəhlükəsizlik yanaşmalarının AI dövründə yetərli olub-olmadığı sualını gündəmə gətirib. Açıq məktubda məhz buna görə “kollektiv cavab” formalaşdırılması, təhlükəsizlik standartlarının yüksəldilməsi və ortaya çıxan təhdidlərə qarşı yeni kommersiya və texnoloji həllərin hazırlanması təklif edilir.
Maraqlıdır ki, məktuba imza atan bir çox AI şirkəti eyni zamanda getdikcə daha güclü süni intellekt modelləri hazırlamağa davam edir. Bununla yanaşı, həmin şirkətlər öz qabaqcıl modellərindən müdafiə məqsədilə istifadə etmək üçün ayrıca proqramlar da işə salırlar. Belə layihələrə OpenAI-ın Daybreak, Anthropic-in Mythos və Microsoft-un yeni Perception kibertəhlükəsizlik platforması daxildir.
