Nvidia ötən rüb üzrə təxminən 100 milyard dollar gəlir əldə etdiyini açıqlasa da, şirkətin eyni dövrdə yaddaş çiplərinin alınmasına yönəltdiyi planlaşdırılan vəsait daha da böyük olub. Məlumata görə, Nvidia təkcə bir rüb ərzində 160 milyard dollarlıq yaddaş tədarükü sifariş etməyi planlaşdırıb.
Bu barədə Tom’s Hardware məlumat yayıb. Söhbət faktiki olaraq alınmış yaddaşın həcmindən deyil, Nvidia-nın tədarükçülərdən sifariş etməyi planlaşdırdığı potensial alışlardan gedir. Bütün bu sifarişlərin həqiqətən həyata keçirilib-keçirilmədiyi hələlik məlum deyil.
Bununla belə, rəqəmlər Nvidia-nın süni intellekt sürətləndiriciləri üçün tələb etdiyi yaddaşın miqyasını daha aydın göstərir. Şirkətin AI sistemləri, xüsusilə böyük hesablama klasterləri üçün istifadə olunan sürətləndiriciləri yüksək ötürmə qabiliyyətinə malik böyük həcmli yaddaş tələb edir.
Məlumata görə, Nvidia yaddaşın bir hissəsini SK Hynix şirkətindən almalı idi. İki şirkət bu ilin əvvəlində yaddaş çiplərinin hazırlanması və tədarükü ilə bağlı uzunmüddətli əməkdaşlıq sazişi bağlayıb.
Qeyd edək ki, Nvidia həmin gün özünün hazırladığı yeni yaddaş növünü — NVHBM texnologiyasını da təqdim edib. Yeni yaddaş yalnız şirkətin tərəfdaşlarına tədarük olunacaq. Nvidia-nın açıqlamasına görə, NVHBM HBM4E ilə müqayisədə daha yüksək ötürmə qabiliyyəti təklif edir və eyni zamanda daha az enerji sərf edir.
