Honor şirkəti böyük təqdimat keçirmədən qlobal saytına yeni büdcə planşeti Pad X7b modelini əlavə edib. Yeni planşet kompakt metal korpusu, 90 Hz yenilənmə tezliyinə malik ekranı və uzun batareya ömrü ilə diqqət çəkir.
Honor Pad X7b 9,7 düymlük ekranla təchiz olunub. Panelin təsvir ölçüsü 2052 × 1152 piksel, yenilənmə tezliyi 90 Hz, maksimal parlaqlığı isə 500 nit təşkil edir. İstehsalçının məlumatına görə, ekran sRGB rəng məkanının 100%-ni əhatə edir. Planşet uzun müddət istifadə zamanı gözlərin yorulmasını azaltmaq üçün proqram təminatı səviyyəsində mavi işıq filtrini, Dynamic Dimming texnologiyasını və xüsusi eBook Mode oxu rejimini dəstəkləyir.
Cihazın performansına Snapdragon 685 çipi cavabdehdir. O, 4 GB operativ yaddaş və 128 GB daxili yaddaş ilə tamamlanır. Operativ yaddaşı virtual olaraq əlavə 4 GB, yaddaşı isə microSD kart vasitəsilə 2 TB-a qədər artırmaq mümkündür.
Planşetin əsas üstünlüklərindən biri 8000 mAh batareyadır. Honor-un təqdim etdiyi məlumatlara görə, bir şarj doldurulması ilə 16 saata qədər fasiləsiz video izləmək, 21 saata qədər elektron kitab oxumaq və ya gözləmə rejimində 82 günə qədər işləmək mümkündür.
Honor Pad X7b-nin Wi-Fi versiyası Səudiyyə Ərəbistanında 133 dollar, LTE modemli versiyası isə 186 dollar qiymətləndirilib.
