Google süni intellektlə kod yazmaq, sənədlərlə işləmək və AI agentlərini idarə etmək üçün nəzərdə tutulan Gemini 4 Hydrogen modelini təqdim edib. Gemini 4 Carbon və Argon kimi mürəkkəb məntiqi tapşırıqlara yönəlmiş modellərdən fərqli olaraq, Hydrogen əsas diqqəti sürətə və resurslardan daha səmərəli istifadəyə yönəldir.
Google-un daxili testlərinə əsasən, model standart yüksək məntiq rejimində Artificial Analysis Intelligence Indextestində 51 bal toplayıb. Bu, Argon modelinin nəticəsindən bir bal çoxdur. Maksimum məntiq rejimində isə göstərici 54 bala çatır. Gemini 4 Hydrogen bir milyon tokenlik kontekst pəncərəsini dəstəkləyir. API vasitəsilə istifadənin qiyməti bir milyon giriş tokeni üçün 1,50 dollar, çıxış tokenləri üçün isə 7,50 dollardır.
Hydrogen-in əsas üstünlüklərindən biri daha güclü modellərlə birlikdə işləmək qabiliyyətidir. Google Antigravity platformasına əlavə edilən Orchestrator sistemi tapşırıqları avtomatik olaraq Carbon və Hydrogen modelləri arasında bölüşdürür. Terminal-Bench 4.0 testində bu kombinasiya yalnız Carbon modelinin istifadəsinə yaxın nəticə göstərib. Bununla yanaşı, sorğu limitindən 24% az istifadə edib və tapşırıqları 19% daha sürətli tamamlayıb. Hydrogen paralel layihələrdə həm əsas işçi, həm də nəticələri yoxlayan agent rolunu da yerinə yetirə bilir.
Google-un məlumatına görə, Gemini 3.8 Flash ilə müqayisədə yeni model tapşırıqları 2,5 dəfə daha sürətli yerinə yetirir. Terminal-Bench 4.1 testində nəticə isə 18,2%-dən 57%-ə yüksəlib. Şirkət həmçinin modelin uydurma məlumatlar yaratma hallarını beş dəfə azaltdığını bildirir. Hydrogen böyük kod repozitoriyaları ilə işləyə, cədvəl və sənədləri təhlil edə, məlumat axtara və lazımsız fayllara müdaxilə etmədən kod yarada bilir.
Yeni model adi istifadəçilər üçün Gemini tətbiqində və Google Axtarışda da əlçatan olacaq. Gemini tətbiqində Hydrogen-in təlimatları daha dəqiq yerinə yetirməsi, uyğun alətləri seçməsi, həmçinin Gmail, Google Drive və qoşulmuş digər xidmətlərdəki məlumatlarla işləməsi gözlənilir. Google Axtarışda isə mürəkkəb sorğuların daha dəqiq başa düşülməsi, daha əyani cavabların təqdim olunması və faydalı saytlara daha geniş keçidlər verilməsi vəd edilir.
Gemini 4 Hydrogen artıq Gemini API, Google AI Studio, Android Studio, Google-un korporativ xidmətləri, Gemini tətbiqi və Axtarış vasitəsilə istifadəyə verilib. Google Antigravity platformasında isə modeldən AI Pro və Ultra abunəçiləri yararlana biləcəklər.
