Avtomobil yarışlarını sevən PlayStation 5 sahibləri Yaponiyanın yollarında sürət həzzini yaşamağa hazırlaşa bilərlər. Forza Horizon 6-nın PS5 versiyası 26 yanvar 2027-ci ildə satışa çıxacaq. Əvvəlcə oyunun 2026-cı ilin sonunadək təqdim edilməsi planlaşdırılsa da, buraxılış tarixi ilk böyük əlavənin çıxışı ilə üst-üstə düşməsi üçün dəyişdirilib.
Playground Games oyunun PS5 versiyası üçün yeni treyler də yayımlayıb. Videodakı görüntülər standart PS5-də «Keyfiyyət» rejimində qeydə alınıb: bu rejimdə oyun 4K təsvir ölçüsündə və saniyədə 30 kadrla işləyir. Daha axıcı yarış təcrübəsi istəyənlər üçün isə «Performans» rejimi də nəzərdə tutulub — burada hədəf saniyədə 60 kadrdır.
Oyunun PlayStation 5-ə uyğunlaşdırılması ilə əvvəllər seriyanın əvvəlki hissəsini də bu platformaya gətirmiş Panic Button studiyası məşğul olur.
PS Store-da üç nəşrin ön sifarişi artıq açılıb:
- Standard Edition — 70 dollar: oyunun əsas versiyası.
- Deluxe Edition — 100 dollar: əsas oyun və əlavə rəqəmsal məzmun.
- Premium Edition — 120 dollar: oyun, ilk böyük genişlənmə və 21 yanvar 2027-ci ildən etibarən erkən giriş imkanı.
İstənilən nəşri öncədən sifariş edən oyunçulara xüsusi bonus da veriləcək: modifikasiya edilmiş Ferrari J50 superkarı. Avtomobil oyunun proloqu tamamlandıqdan sonra qaraja əlavə olunacaq.
PS5 versiyası digər platformalarla da sıx inteqrasiya olunacaq. Oyunçular Xbox Series X/S və PC istifadəçiləri ilə birlikdə yarışa, həmçinin platformalar arasında irəliləyişlərini saxlaya biləcəklər. Bundan başqa, PS5-də ilk gündən etibarən icmanın əvvəlki aylarda hazırladığı istifadəçi məzmunu da əlçatan olacaq. Buraya EventLab-da yaradılmış traslar, avtomobil dizaynları və hazır tüninq parametrləri daxildir.
Xatırladaq ki, Forza Horizon 6-nın hadisələri Yaponiyada cərəyan edir və oyunda 550-dən çox real avtomobil yer alır. Yarış oyununun PC və Xbox versiyaları 19 may 2026-cı ildə satışa çıxıb. Forza Horizon 6 2026-cı ilin ilk yarısında Metacritic-də ən yüksək qiymətləndirilən oyun olub.
