Meta proqramçılar üçün hazırlanmış yeni süni intellekt aləti Muse Code-u təqdim edib. Hazırda beta mərhələsində olan AI agenti böyük kod bazalarında mürəkkəb proqramlaşdırma tapşırıqlarını avtomatik yerinə yetirmək üçün nəzərdə tutulub.
Şirkətin baş direktoru Mark Zukerberq bildirib ki, Muse Code böyük proqram layihələrində tam proqram mühəndisliyi prosesini həyata keçirə bilir. Agent dəyişikliklərin planlaşdırılması, kodun yazılması, nəticələrin yoxlanılması və digər mürəkkəb tapşırıqları müstəqil şəkildə icra edir.
Muse Code bir komanda ilə quraşdırılır və Meta-nın daha əvvəl təqdim etdiyi Muse Spark kod modeli əsasında işləyir. Böyük layihələr zamanı sistem işi bir neçə müstəqil AI agenti arasında bölüşdürür. Onlar paralel şəkildə fərqli hissələr üzərində işləyərək tapşırıqları daha sürətli yerinə yetirirlər.
Zukerberqin sözlərinə görə, AI agentləri istifadəçinin əsas layihə fayllarına toxunmur və bütün əməliyyatları ayrıca iş mühitində həyata keçirirlər. Daxili sınaqlar zamanı sistem eyni anda bir oyuna aid altı müxtəlif funksiyanı uğurla hazırlayıb və agentlər arasında heç bir konflikt yaranmayıb.
Yeni məhsulla Meta, proqramlaşdırma sahəsində OpenAI Codex və Anthropic Claude Code kimi rəqiblərlə daha ciddi rəqabət aparmağı hədəfləyir. Meta Superintelligence Labs bölməsinin rəhbəri Aleksandr Vanq bildirib ki, Muse Code xüsusilə qiymət baxımından bir çox şirkət üçün daha sərfəli seçim ola bilər.
Qeyd edək ki, Meta son aylarda süni intellekt istiqamətinə investisiyalarını əhəmiyyətli dərəcədə artırıb. Şirkət iyun ayında müştəri xidməti və texniki dəstək üçün AI agenti təqdim etməklə korporativ süni intellekt bazarına da daxil olmuşdu.
