Google şirkəti ilk dəfə rəsmi olaraq Android və Chrome OS platformalarını birləşdirmək üzərində işlədiyini təsdiqləyib. Bu barədə Android ekosistemi üzrə prezident Samer Samat TechRadar-a müsahibəsində danışıb. Onun sözlərinə görə, Google istifadəçilərin noutbuklardan necə faydalandığını araşdırır və bu təcrübəni yeni platformanın yaradılmasında nəzərə almağı planlaşdırır.
Layihənin təfərrüatları hələlik açıqlanmasa da, məlumdur ki, məqsəd tamamilə yeni əməliyyat sistemi yaratmaq deyil, Chrome OS sistemini Android bazasına keçirməkdir. Bu addım həm hər iki platformanın inkişafını asanlaşdıracaq, həm də tətbiqlərin uyğunluğunu və süni intellekt funksiyalarının inteqrasiyasını sürətləndirəcək.
Artıq Android sistemində böyük ekranlara uyğun imkanlar peyda olub — masaüstü rejimi, pəncərələrin çevik idarə olunması və xarici monitor dəstəyi kimi funksiyalar aktiv şəkildə inkişaf etdirilir. Bu da Android-in yalnız smartfonlarda deyil, eyni zamanda noutbuklarda da istifadəsinə zəmin yaradır. Yekunda birləşdirilmiş platforma bu strategiyanın məntiqi davamı ola bilər.
Yeni sistemin nə zaman istifadəyə veriləcəyi hələ dəqiq deyil. Qeyri-rəsmi məlumatlara əsasən, Google bu platforma ilə işləyən yeni Pixel noutbuk hazırlayır, lakin rəsmi tarixlər hələ açıqlanmayıb. Görünən odur ki, bu keçid bir neçə il çəkə bilər.
