ABŞ-ın “eBay” şirkəti avstraliyalı Myer pərakəndə satış şirkəti ilə birgə layihəsi olan dünyanın ilk VR-mağazasını təqdim edib.
Virtual mağazaya daxil olmaq üçün “eBay Virtual Reality Department Store” tətbiqetməsi Android və iOS əməliyyat sistemləri ilə çalışan cihazlara quraşdırıla bilər və istənilən VR-dəbilqədən istifadə oluna bilər. Şirkət həm də 20 min “Google Cardboard” virtual reallıq eynəklərini pulsuz olaraq istifadəçilərə təqdim edir. Bildirilir ki, layihədə hərəkətlərin baxışla idarə edilməsi üçün “eBay Sight Search” texnologiyasından istifadə olunur. Belə ki, hansısa bir əşyanı seçmək üçün ona bir neçə saniyə baxmaq kifayətdir. Artıq bir çox məhşur məhsulun 3D-modelləri hazırlanıb və gələcəkdə belə məhsulların sayının artacağı gözlənilir.
